كنت باتفرج ع التليفزيون وبادور على أى مشهد يفرحنى .. يسعدنى .. أو يضحكنى ..وكانت إزازة البيبسى جنبى..باحاول بيها أخلى الأكل يتهضم غصباً عنه .. وهو ده إعتقادى كل يوم لما باروَح بيتى بعد كل يوم عمل شاق ..طيب بلاش التليفزيون.. كله حوادث وأخبار وبلاوى تخلى الإكتئاب ينأح عليا .. ومهما لبخت له مش بينصرف بسهولة ..طيب خلينى أنقل ع الكومبيوتر وأشوف اليوتيوب يمكن ألاقى حاجه حلوة عليه..لقيت بلاوى أكتر بتشدنى من أفكارى وتوقعنى ع الأرض .. أم المعارك .. ومش عارف فى قبلها كلمه ولا لأ..كليبات جزائريه موجهة إلى عمق الحضارة والشموخ المصرى مثلاً : كليب إسمه ليلة سقوط أبو الهول .. بيصوروا فيه النصب التذكارى لشهداء ثورة الجزائر وكأنه صاروخ يتجه إلى أبو الهول ويدمره بالكامل ويظل الصاروخ منتصباً - وخد بالك من منتصباً دى - حتى بعد تدمير أبو الهول ليلة 14 -11- 2009 وبعدين إفتكرت إنهم كانوا عاوزين يتفسحوا ف الأهرام ولابد من حاجه تهديهم بعد مباراة .. أم المعارك ..ونسيوا إنهم لما يروحوا الجزائر .. الشعب الجزائرى هو إللى حيقوم بالمهمة دى ويبسطهم ويبرد نارهم ..وشفت كمان صور وجوه فناناتنا الكبار وهم على أجسام لا عبينا الكبار أبطال أفريقيا وتعليق فنانتنا الكبيرة يسرا وهى بتقول الرد حيكون ف الملعب من رجالتنا .. هو ده الكلام ياست ..وشوفت المسرحية الهابطة بتاعة الإتوبيس بتاعهم لما وصلوا ..شوية ممثلين هابطين وفاشلين كانوا بيحضروا نفسهم عشان يلاقوا شماعه يعلقوا عليها فشلهم لما يت.......هزموا ف إستاد الرعب ..وحاجات كتير بايخه وعبيطه تدل على فشل مخى حاد ويحتاج لغسيل فى دراى كلين بس يكون فرنساوى - هه - .وبعدين إبتدت المبارة .... ودقيقتين ..والبلدوزر - عمرو زكى - جاب الهدف الأول لمصرنا وشفنا سد إفريقيا العالى وهو بيدافع عن مرماه وبشموخ - صُنع فى مصر _ وبخبرة لابد أن تُدرس لكل حراس المرمى فى العالم .. وشفنا السقا وهو بيعطشهم .. و سيد معوض وهو بيعوض لنا كل إللى فات مننا ..و أبطال كتير ف الساحهوفى الشوط التانى بدأت تمثيلية تضييع الوقت - بايخة وقديمة - والحكم كان شايفها قبل كده وحسب وقت بدل ضايع 6 دقايق .... تم فيهم الإجهاز على بقايا الفريق الجزائرى الشقيق- وبدون قاف فى الآخر- بالهدف الرائع للعائد إلى عرينه بقوة العمدة - عماد متعب - إللى تعبهم ودوخهم .... وكاد أن يفعلها بركات فى الثوانى الأخيرة .. ,- وباطمنكم الحمدلله الأكل إتهضم وبدون بيبسى ولا كوكه الجزاير بإذن الله مدعوكه - ولكن إرادة الله أبت إلا أن يتمتع أخوتنا ف السودان بليلة كروية يوم الأربعاء القادم ولسه فى كمان و كماااااااااااااان ........حنفرمهم ف السودان ........بإذن الله .....إدعوا معى ...يارب إحفظ أولاد مصر ...فريق الساجدين والشاكرين لفضلك
ليست هناك تعليقات:
إرسال تعليق